Небяспечныя цацкі

Новы год, падарункі, усмешкі дзяцей. Але ці заўсёды разам з падарункам мы дорым дзіцяці радасць? Ці ёсць імавернасць набыць у дзіцячых крамах таксічную цацку? На гэтае пытанне спрабавалі адказаць эксперты інфармацыйнага цэнтру экалагічных рашэнняў. Паводле праведзенага імі даследавання, кожная трэцяя цацка ў Беларусі патэнцыйна небяспечная. КАЦЯРЫНА ТКАЧЭНКА, МАЦІ: "Калі набываеш нейкія цацкі, увесь час думаеш, а ці якасныя яны, і глядзіш на краіну-вытворцу, глядзіш, як яны зробленыя. Бо гэта -- здароўе дзіцяці". Але нават сур'ёзны падыход да выбару цацак не гарантуе, што яны не ўтрымліваюць шкодных рэчываў. Незалежнае тэставанне цацак і забавак, якія ўжо прайшлі неабходную сертыфікацыю і прадаюцца ў крамах і на рынках, праводзілася ў межах рэгіянальнага праекту "Таксічныя металы ў таварах для дзяцей".