Актывiст: Тавары павінны маркіравацца беларускай мовай

«Беларускае таварыства абароны спажыўцоў» пагадзілася з тым, што гэтую норму трэба замацаваць заканадаўча.

«Беларускія тавары абавязкова павінны маркіравацца беларускай мовай, гэта трэба замацаваць заканадаўча», – заявіў «Радыё Рацыя» каардынатар грамадскай кампаніі «Справаводства па-беларуску» Ігар Случак.

Гэта паспрыяе ўмацаванню дзяржаўнага прэстыжу Беларусі, а таксама выкананню канстытуцыйных правоў перад беларускамоўным насельніцтвам.

Ігар Случак з дапамогай адпаведных лістоў заклікаў падтрымаць ініцыятыву шматлікія таварыствы, якія абараняюць правы спажыўцоў:

- Прыйшло некалькі адказаў з рэгіянальных спажывецкіх таварыстваў, якія падтрымліваюць змены Закону аб абароне правоў спажыўцоў, паводле якіх інфармацыя пра тавары павінна быць на дзвюх дзяржаўных мовах. Таксама прыйшоў даволі добры адказ з офіса «Беларускага таварыства абароны спажыўцоў», што сапраўды такія змены патрэбныя.

Згодна патрабаванням Мытнага саюза, тавары абавязкова павінны маркіравацца па-расейску. Многія беларускія вытворцы абмяжоўваюцца толькі расейскамоўнай маркіроўкай, ігнаруючы другую дзяржаўную мову.