Што анансавалі на Дзень роднай мовы ў гарадах Беларусi

Дзень роднай мовы адзначаць у Менску, Бабруйску, Берасьці, Віцебску, Горадні і Магілёве.

«Арт-сядзіба», кампанія «Будзьма беларусамі», Саюз беларускіх пісьменьнікаў, ПЭН-цэнтар і каталёг Say.by абвясьцілі кампанію «Беларускамоўны» з нагоды Міжнароднага дня роднай мовы, які адзначаецца штогод 21 лютага. Кампанія, кажуць стваральнікі, мае на мэце дасягнуць рэальнага моўнага раўнапраўя ў Беларусі, паведамляе «Радыё Свабода».

З нагоды сьвята на 21 лютага ўжо анансаваныя імпрэзы ў шэрагу гарадоў.

Менск: канцэрт у кавярні «Грай»

Вуліца Інтэрнацыянальная, 33

Пачатак 21 лютага а 18:00

Інфалінія: +375 25 996 93 76

Выступяць гурт Akute, сьпявак Uzari, рэпэр Angst, літаратары Ўсевалад Сьцебурака, Наста Кудасава, Марыя Мартысевіч і Стась Карпаў. Таксама анансаваныя гульні і конкурсы для дарослых і дзяцей, прэзэнтацыя мабільнага дапаможніка для размоваў па-беларуску ў сфэры абслугоўваньня ад Say.by. Уваход вольны пасьля рэгістрацыі.

Берасьце: канцэрт у прасторы «Дзедзіч»

Вуліца Маякоўскага, 46

Пачатак 21 лютага а 18:00

Літаратурна-музычная замалёўка «Хутка вясна» зь пісьменьніцай Натальляй Харытанюк і музыкамі Алесяй Сівохінай і Алесем Камоцкім. Уваход вольны.

Магілёў: канцэрт у цэнтры «Кола»

Завулак Чкалава, 16

Пачатак 21 лютага а 18:30

Творчая сустрэча з журналістам Алесем Кіркевічам і «рыцарская праграма» ад клюбу «Волат» з выставай дасьпехаў, баямі на мячах і конкурсамі. Уваход вольны.

Горадня: канцэрт у прасторы «Ў цэнтры»

Вуліца Кірава, 3

Пачатак 21 лютага а 19:00

Зьміцер Вайцюшкевіч дасьць першы канцэрт, зьвязаны з Днём роднай мовы. Уваход вольны. Праз два дні Вайцюшкевіч таксама сьпяе ў Бабруйску (глядзіце ніжэй).

Імпрэзы пройдуць і ў наступныя дні.

Віцебск: канцэрт у «Торвальдзе» 22 лютага

Вуліца Талстога, 1

Пачатак 22 лютага а 19:00

Творчы вечар сьпевака Андруся Такіданга. Уваход вольны.

Бабруйск: канцэрт у «1387» 23 лютага

Вуліца Чангарская, 54

Пачатак 23 лютага а 18:00

«Сьпеўны сход» пройдзе пры ўдзеле Зьмітра Вайцюшкевіча, таксама заграюць неназваныя мясцовыя гурты, а курсы «Мова Нанова» адсьвяткуюць пяцігодзьдзе дзейнасьці ў Бабруйску. Уваход вольны.

P.S. Таксама 21 лютага па ўсёй Беларусі (і ў некаторых гарадах за мяжой) Таварыства беларускай мовы будзе праводзіць Агульнанацыянальную дыктоўку. Дакладны расклад з адрасамі мае зьявіцца ў «Нашым слове», тэксты дыктовак ужо прапанаваныя.