Вясновыя канікулы і «Беларускія ўікэнды»: якiя фильмы пакажуць у Мінску?

Праект «Беларускія ўікэнды» плануе парадаваць гледачоў спецыяльнымі паказамі стужак, прызначаных пераважна для дзіцячай аўдыторыі, аднак цікавых для ўсіх аматараў добрага кіно на роднай мове. Гаворка ідзе пра фільмы «Шторм: палаючы ліст» і «Мой сябар жырафа». Агучку і пераклад фільмаў на беларускую мову выканала кампанія «Кінаконг» пры падтрымцы velcom.

Паказы абедзвюх гэтых карцін у рамках праекта «Беларускія ўікэнды» ўжо збіралі поўныя залы ў кінатэатрах Мінска і іншых гарадоў Беларусі. У хуткім часе гледачоў чакае магчымасць яшчэ раз сустрэцца з іх героямі.

Акунуцца ў атмасферу Еўропы эпохі Рэфармацыі і ўзгадаць гісторыю 12-гадовага Шторма Вотана, якому належыць выратаваць каштоўны рукапіс Марціна Лютэра ад знішчэння, а свайго бацьку, кнігавыдаўца Клааса Вотана, — ад інквізіцыі, можна будзе 16 сакавіка ў мінскіх кінатэатрах «Аўрора» і «Дом кіно».

А ў дні школьных канікул праект «Беларускія ўікэнды» запросіць дзяцей і іх бацькоў на паказы сямейнага фільма «Мой сябар жырафа» – чароўнай гісторыі аб моцным сяброўстве звычайнага хлопчыка і гаворачай жырафы па імені Раф, якія настолькі прывыклі заўсёды быць побач адзін з адным, што нават у першы клас таксама збіраюцца ісці разам, што б ні казалі на гэты конт дарослыя. Стужка стала адной з самых касавых за апошні год і ўвайшла ў ТОП-5 рэйтынгу мінскага кінапракату па выніках першага ўікэнда верасня. 25 сакавіка яе можна будзе паглядзець у «Доме кіно», а 27 і 28 сакавіка – у кінатэатры «Цэнтральны».

Квіткі на паказы фільма можна набыць анлайн і ў касах кінатэатраў. Сачыць за навінамі «Беларускіх уікэндаў» і раскладам сеансаў можна на сайтах kinakong.by і velcom.by.