На сведак, якія фігуруюць у справе Змітра Паліенкi, ідзе ціск

З 24 сакавіка палiтвязень трымае галадоўку.

Да раніцы 30 сакавіка былому палітвязню Змітру Паліенку альбо будзе прад’яўлена абвінавачванне, альбо яго выпусцяць на волю. «Тым часам, ідзе ўскосны ціск на сведак, якія праходзяць па справе Зміцера», – распавёў сайту palitviazni.info яго паплечнік Вячаслаў Касінераў.

Нагадаем, што 20 сакавіка ў Мінску каля дзясятай гадзіны раніцы ў сваёй кватэры быў затрыманы актывіст і былы палітвязень Зміцер Паліенка. Яго падазраюць у здзяйсненні злачынства па артыкуле 339, ч.3 КК РБ (“Асабліва злоснае хуліганства”), паведамляе spring96.org.

У актывіста канфіскавалі ўсю тэхніку (кампутар, мабільны тэлефон), літаратуру, улёткі, налепкі і г.д.

Па версіі следства, жыхар дома заўважыў на лесвічнай пляцоўцы незнаёмага хлопца, той паліў. На заўвагу Паліенка быццам бы пырснуў у твар з газавага балончыка. Зараз Зміцер знаходзіцца ў ізалятары часовага ўтрымання і чакае, якім чынам далей будзе развівацца справа. Вядома, што Паліенка пакуль затрыманы на 10 сутак.

“Да раніцы 30 сакавіка Зміцеру павінны альбо прад’явіць абвінавачванне, альбо адпусціць на волю, – кажа Вячаслаў Касінераў. – У той жа час стала вядома, што машыны без нумароў пад’язджаюць да сведак, якія фігуруюць у справе Зміцера Паліенкі, на іх ідзе своеасаблівы ціск. Да людзей пад’язджаюць машыны без нумароў і прапаноўваць “паразмаўляць у аўтамабілі”. Сведкі, натуральна, не пагаджаюцца, бо гэта больш нагадвае бандытызм”.

Са слоў Касінерава, жыхары пад’езда, дзе адбыўся інцыдэнт, бачаць, што зараз міліцыянеры праводзяць нейкія следчыя дзеянні з быццам бы пацярпелым.

“Не выключаю, што яму могуць падказваць, што казаць і як сябе паводзіць, – мяркуе суразмоўца. – Да таго ж, адвакат Зміцера Паліенка сцвярджае, што і самі следчыя бачаць: справа максімум цягне на адміністратыўны артыкул. Але ўсім зразумела, што да “палітычных” ва ўладаў асаблівае стаўленне, і ўся гэтая справа – нейкія незразумелыя загады зверху. Хаця і незразумела, адкуль канкрэтна ідуць такія загады”.

Нагадаем, што з 24 сакавіка Зміцер Паліенка трымае галадоўку.

“Зміцер – прынцыповы хлопец, і пакуль не выканаюць яго патрабаванні, будзе галадаць, – адзначае Вячаслаў Касінераў. – І ў гэтай сувязі мы перажываем за задроўе і жыццё Змітра”.