Пад Горадняй ушанавалі памяць галоўнакамандуючага войскамі БНР

Адзін з найбольш выбітных удзельнікаў Слуцкага збройнага чыну нарадзіўся на Гарадзеншчыне.

27 лістапада, у дзень пачатку Слуцкага збройнага чыну, гарадзенскі грамадскі актывіст, краязнаўца Дзяніс Жыгавец звярнуўся да гарадзенцаў з прапановай узгадваць Слуцкіх паўстанцаў і на Гарадзеншчыне, перадае «Радыё Рацыя».

«Мы, гарадзенцы, маем мажлівасць і маем права ўшанаваць памяць Андрэя Якубецкага, так як гэтая асоба паходзіла з Гарадзеншчыны з вёскі Сухмяні, прымала актыўны ўдзел у Слуцкім Збройным чыне. У той час Рада БНР яго прызначыла галоўнакамандуючым войскамі», — лічыць актывіст.

Грамадскі актывіст кажа, што на сімвалічную магілу Якубецкага не трэба ехаць далёка, яна ў некалькіх кіламетрах ад гораду.

«У вёсцы Капцёўка стаіць кенатаф па Андрэю Якубецкаму побач з магілай бацькі і малодшага брата, якія, дарэчы, таксама былі ўдзельнікамі беларускіх гурткоў на Гарадзеншчыне», — кажа актывіст.

Помнік Андрэю Якубецкаму быў пастаўлены ў лістападзе 2016 году, дзякуючы нашчадкам вайскоўца ды валанцёрам. Рэальнае месца пахавання і дата смерці Андрэя Якубецкага дагэтуль невядомыя.