Актывіст з Слоніма: Беларусы здолеюць самаарганізавацца на гэтым выбарчым спектаклі

Краіне патрэбны прэзідэнт, які любіць свой народ, краіну і будзе адстойваць інтарэсы дзяржавы.

У краіне працягваецца збор подпісаў. Пра сваё стаўленне да таго, што адбываецца ў краіне распавядае gs.by кіраўнік слонімскай Беларускай хрысціянскай дэмакратыі Іван Бедка.

— Ці будзеце назіраць за выбарамі? Каго падтрымаеце сярод удзельнікаў кампаніі?

— Калі будзе магчымасць праводзіць назіранне, безумоўна, буду назіраць і фіксаваць усе парушэнні заканадаўства. Але мой вялікі вопыт назірання паказвае, што ўладзе на ўсё напляваць. Вынікі «выбараў» яны малююць такія, якія ім патрэбны.

Я падтрымаю любога, хто за незалежную і самастойную, дэмакратычную Беларусь без карупцыі.

— Які кандыдат у прэзідэнты патрэбен беларусам?

— На маю думку, патрэбны чалавек, які любіць свой народ, сваю краіну, сумленны, які будзе адстойваць інтарэсы дзяржавы, а галоўнае, здаровы, без усялякіх хібаў.

— Лукашэнка затрымлівае актывістаў. Ці здольны грамадзяне Беларусі самаарганізавацца?

— Хачу спадзявацца, што грамадзяне здолеюць самаарганізавацца на гэтым выбарчым спектаклі. Калі не, то гэта можа каштаваць Беларусі незалежнасці. Таму што гэтая ўлада нічога добрага прапанаваць не здольная. Дакіраваліся: ні работы, ні дастойных заробкаў людзям.

— Што можаце сказаць пра Ціханоўскага, Цэпкалу і Бабарыку? Хто з іх бліжэй?

— Нікога з іх не ведаю так, каб мог ім верыць. Тым, хто быў ва ўладзе Лукашэнкі, асабліва не веру. Напэўна, бліжэй Ціханоўскі, калі ён падтрымлівае тыя каштоўнасці, пра якія сказана вышэй.

— Чаму людзі паверылі ім і ідуць за імі?

— Людзям абрыдла існуючая ўлада на чале з Лукашэнкам. Яны патрабуюць пераменаў. Хочуць жыць у цывілізаванай краіне.

Лукашэнка можа сысці, толькі калі народ масава выкажа сваю нязгоду з ім.