Біскуп Юрый Касабуцкі: Езуса укрыжавалі, бо хтосьці адчуў страх згубіць сваю ўладу

Зварот да беларусаў з нагоды свята Божай Міласэрнасці.

Біскуп Юрый Касабуцкі звярнуўся да беларусаў з нагоды свята Божай Міласэрнасці, якое сёння, 11 красавіка, абходзіць Каталіцкі касцёл:

— Тыдзень таму мы радасна адзначылі ўрачыстасць уваскрасення Хрыста.

Мы разважалі пра апошнія дні жыцця Божага Сына на зямлі.

Узгадвалі, як Езуса Хрыста прадаў Іуда Іскарыёт і паказаў жаўнерам, каго яны павінны арыштаваць…

Разважалі мы пра тое, як над Збаўцам здекваліся жаўнеры ў вязніцы, наккінушы на Яго чырвоны плашч і цярновы вянец, білі Яго па галаве і смяяліся з яго…

Суд, на якім выступілі фальшывыя сведкі… Нават Пілат умыў рукі, бо бачыў, што адбываецца, і не хацеў у гэтым удзельнічаць…

Прыгавор… Ці ж Езус Хрыстус заслугоўваў на смяротнае пакаранне?… Толькі за тое, што камусьці не падабалася Яго вучэнне?…Толькі за тое, што хтосьці адчуваў у сумленні свае грахі і хацеў заглушыць у сабе гэты голас?… Толькі таму, што хтосьці адчуў страх згубіць сваю ўладу і ўплыў на людзей?… Толькі за тое, што Хрыстос адкрыта зло называў злом, а дабро дабром, і гэта не супадала з афіцыйнай ідэалогіяй тагачасных габрэяў?… Прычын было шмат, але ці была хоць адна аб’ектыўная?…

(Прайшло дзве тысячы гадоў… А ад той пары амаль нічога не змянілася, чалавек адчувае тое самае…)

Укрыжаванне…. Смерць… Магіла… Здавалася, што канец, ўсё скончылася… Аднак Бог паказаў, што ў такіх сітуацыях нельга падаць духам…

Слаўнае ўваскрасенне… Перамога над смерцю і злом…

У нядзелю пасля Пасхі мы адзначаем свята Божай Міласэрнасці. Хрыстос, які сваім уваскрасеннем перамог смерць, паказвае свету бязмежную любоў Бога да чалавека. Бог заўсёды гатовы прабачыць нам нашыя грахі, якімі б цяжкімі яны не былі б… Толькі нашае пакаянне, навяртанне і жаданне больш не грашыць…

Молімся за ўсіх, каму найбольш патрэбна Божая Міласэрнасць… Асабліва молімся за нашу родную Беларусь і шчаслівую будучыню для нас усіх… Асабліва молімся за тых, хто так, як Хрыстос, перажывае сёння моцныя выпрабаванні…

Хрыстос уваскрос!