Андрэй Саннікаў павіншаваў беларусаў з Днём Волі

З намі сёння нашы скарбы, вечныя і несмяротныя.

Лідар грамадзянскай кампаніі «Еўрапейская Беларусь» Андрэй Саннікаў павіншаваў беларусаў з Днём Волі:

— З Днём Волі, дарагія суайчыннікі, дарагія людзі Зямлі беларускай, дзе б вы ні былі ў гэтыя дні. З нашым галоўным святам!

У гэты дзень мы з выдатнымі дзеячамі 1918 года, якія абвясцілі Беларускую Народную Рэспубліку і аб'явілі яе «незалежнай і вольнай дзяржавай». А яны з намі.

З намі героі, якія змагаліся і змагаюцца за свабоду і незалежнасць Беларусі нават у самы змрочны час татальных рэпрэсій. А мы з імі.

З намі ўсе нашыя шматтысячныя пратэсты і адзіночныя акты мужнасьці, усе нашыя Плошчы па ўсёй Беларусі. І мы не сыдзем з іх, пакуль не вызвалім Беларусь.

Мы сёння з тымі, хто асабліва мае патрэбу ў нашай салідарнасці і нашым клопаце, каго антыбеларускі рэжым кінуў у зінданы за іх барацьбу за свабоду Беларусі, за жаданне «людзьмі звацца».

З намі сёння нашы скарбы - мова, культура, гісторыя.

Яны вечныя і несмяротныя.

Гэта галоўныя багацці зямлі, на якой

Жыве Беларусь!