Рэцэпт ратавання эканомікі?

Акрамя магіі лічбаў улады разлічваюць яшчэ прынамсі на адзін рэцэпт ратавання эканомікі. Гаворка вядзецца пра чарговыя крэдыты, якія афіцыйны Менск актыўна шукае як на захадзе, гэтак і на ўсходзе. Паводле неафіцыйнай інфармацыі, 6--20 снежня чакаецца прыезд у Беларусь місіі Міжнароднага валютнага фонду дзеля перамоваў пра новую праграму stand-by. Аднак у прадстаўніцтве МВФ у Менску такога намеру не пацвярджаюць. Улады Беларусі ўсцяж спадзяюцца атрымаць ад МВФ 3,5--7 млрд долараў пазыкі. Больш плённым можа аказацца запланаваны на пятніцу візіт Аляксандра Лукашэнкі ў Маскву. Прэзідэнт возьме ўдзел у паседжанні Вышэйшай дзяржаўнай рады Саюзнай дзяржавы, на якім плануецца падпісаць пагадненне аб вылучэнні крэдыту на пабудову Астравецкай АЭС. Тады ж можа быць заключаны і кантракт на пастаўку ў Беларусь расейскага газу па зніжаных коштах. Гэта стане магчымым разам з падпісаннем дамовы аб куплі-продажы другіх 50 % «Белтрансгазу», у выніку чаго «Газпром» зробіцца ўладальнікам поўнага пакету акцыяў беларускага канцэрну. Вольга Старасціна, «Аб'ектыў»