Замена нязменнаму

Чыноўніка, які як ніхто іншы верыў у перспектывы расейска-беларускага аб'яднання, звольнілі з пасады дзяржаўнага сакратара Саюзнай дзяржавы. Хто заменіць Паўла Барадзіна, стала вядома на сённяшнім паседжанні Найвышэйшага дзяржаўнага савету. Новым дзяржаўным сакратаром Саюзнай дзяржавы стане Грыгорый Рапота. Ягоная кар'ера пачыналася ў Камітэце дзяржаўнай бяспекі Савецкага Саюзу, потым была праца ў Службе замежнай выведкі Расеі. Апошні час ён быў паўнамоцным прадстаўніком прэзідэнта Расеі ў Прыволжскай федэральнай акрузе. Рапота прыступіць да выканання абавязкаў 15 снежня. Дванаццаць гадоў гэтую пасаду займаў Павел Барадзін. Перакананы прыхільнік аб'яднання Беларусі ды Расеі, ён быў адным з тых, хто настойваў на прыняцці адпаведнага канстытуцыйнага акту. Каментуючы сваю адстаўку, Барадзін прызнаўся, што заўсёды выконваў тое, чаго ад яго прасілі, залішняга не казаў. Вінаватымі ў сваім змяшчэнні назваў асобаў, якія агаворвалі яго перад першымі асобамі абедзвюх дзяржаваў. Аліна Радачынская, "Аб'ектыў"