Рэкамендавана абскардзіць

Усёй справы гэта, канечне, не пераверне, але падзея вельмі істотная. Вынікі экспертызы, праведзенай Радаю правоў чалавека пры прэзідэнту Расеі, у так званай "другой справе ЮКОСу" ацаніў адвакат Міхаіла Хадаркоўскага Вадзім Клюўгант. Напярэдадні Рада парэкамендавала Генеральнай пракуратуры абскардзіць прысуд. ВАДЗІМ КЛЮЎГАНТ, АДВАКАТ МІХАІЛА ХАДАРКОЎСКАГА: "Гэта азначае прынамсі тое, што тэма з агульнадзяржаўнага ці, калі хочаце, міжнароднага парадку дня ўжо ніколі не сыдзе, што загаварыць, заматляць, замаўчаць яе ўжо не ўдасца -- ні хлуснёю, ні ўдаваннем, што нічога не адбываецца". Эксперты Рады пры прэзідэнту Расеі не выявілі ў дзеяннях асуджаных Міхаіла Хадаркоўскага і Платона Лебедзева складу злачынства, затое выкрылі фундаментальныя парушэнні ў справе, паводле якой бізнесоўцаў асудзілі на 13 гадоў зняволення. Генеральная пракуратура экспертызы пакуль не каментуе. У Маскоўскім жа гарадскім судзе рэкамендацыі прэзідэнцкай Рады назвалі "меркаваннем прыватных асобаў". Вольга Кляўчэня, "Аб'ектыў"