Ізноў катаванне

Сяргея Каваленку, якога трымаюць у віцебскім СІЗА, пачалі прымусова карміць. Паводле Сусветнай арганізацыі здароўя прымусовае кармленне прыраўноўваецца да катаванняў. Ужылі яго ў адносінах арыштаванага актывіста на 31-ы дзень галадоўкі. АЛЕНА КАВАЛЕНКА, ЖОНКА АКТЫВІСТА СЯРГЕЯ КАВАЛЕНКІ: "Я запыталася, ці выйшаў ён з галадоўкі. Яны сказалі, што не. Але мне паведамілі, што яны пачалі прымусова яго карміць. Я запытала, як гэта выглядае. Маўляў, прышпільваюць да ложка? Яны нічога не сказалі на гэты конт". Актывіста КХП БНФ арыштавалі летась 22 снежня за парушэнне рэжыму «хатняй хіміі», да якой Сяргея Каваленку асудзілі за вывешванне бел-чырвона-белага сцяга на навагодняй ялінцы ў Віцебску 7 студзеня 2010 года. Актывісту пагражае да трох гадоў пазбаўлення волі. Пасля арышту Сяргея жонка Алена з двума няпоўнагадовымі дзецьмі засталася без сродкаў да існавання. У сацыяльных сетках разгарнулася кампанія дзеля падтрымання сям'і рэпрэсаванага актывіста. Сяргей Скулавец, "Аб'ектыў"