Афрыканская чума ў Беларусі?

Сельскія жыхары напалоханыя. Пасля таго, як у вёсцы Нязнанава, што на Наваградчыне, сабралі усіх свіней і спалілі, улады заклікалі не хвалявацца ды назвалі гэта "ветэрынарнымі вучэннямі". Аднак даследаванні жывёлы адбываюцца і ў суседніх паселішчах. Паводле сайту "Хартыя", лабараторныя экспертызы пацвярджаюць страшную хваробу -- афрыканскую свіную чуму. Нашыя карэспандэнты вырашылі даследаваць справу ад пачатку, наведаўшы Наваградчыну. Гэтыя парсючкі яшчэ жывыя. Але не таму, што яшчэ не выгадаваныя. Іхны гаспадар жыве ў суседняй ад Нязнанава вёсцы Валейкі. Тут пакуль свіней не знішчаюць, аднак ці не штодня даследуюць. Вось такія распіскі не забіваць жывёлінаў дзеля рэалізацыйных ці іншых мэтаў падпісалі ўсе вяскоўцы. Уладальнікі свіней у паніцы перад ветэрынарнымі службамі адмаўляюцца прамаўляць на камеру.