Трагедыя аднаго чалавека

Віцебскага актывіста Сяргея Каваленку за ўзняты ім над горадам бел-чырвона-белы сцяг асудзілі на 2 гады і 1 месяц калоніі. Не дапамаглі ні пратэсты грамадзянскай супольнасці, ні замежныя дыпламаты, якія прыехалі на суд, каб выказаць салідарнасць з патрыётам. Працаўнік польскай амбасады Вітальд Яраш назваў гэтую падзею трагедыяй аднаго чалавека, які цярпіць праз сваю адвагу, у той час як іншыя ў зале цярпяць ад яе адсутнасці. У калідоры віравалі масы журналістаў, праваабаронцаў і сваякоў віцебскага галадоўніка, не дапушчаныя ў залу. Ад нараканняў на дзеянні суддзі ды міліцыі ў судовай кнізе скаргаў не засталося чыстых аркушаў. Пры гэтым суддзя Алена Жук, паводле відавочцаў, заставалася спакойная, быццам рашэнне прынятае загадзя.