Спартовы агляд

ЧВЭРЦЬФІНАЛЫ -- ВА ЎІК-ЭНД Стала больш яснасці з часам і месцам правядзення чвэрцьфінальных матчаў 21-га Кубку Беларусі па футболе. Сёння невядомая толькі стартавая хвіліна сустрэчы паміж клубам трэцяга дывізіёну, "Ліда", і наваполацкім "Нафтанам", але гульня дакладна пройдзе на лідскім стадыёне "Юнацтва" 17 сакавіка. У той жа дзень а 14-й гадзіне "Берасце" на стадыёне "Дынама" прыме ўладальніка суперкубка, "Гомель". Каманда першай лігі "Клечаск" з Клецку ў якасці гаспадароў згуляе з "Нёмнам" на штучным газоне гарадзенскага цэнтральнага спартовага комплексу. А распачнецца гэты двубой а 15-й. Нарэшце ў нядзелю паўфіналіст у пары сталічных СКВІЧу і "Менску" вызначыцца на штучным газоне спартовага комплексу "Алімпійскі", а распачнецца матч таксама а 15-й гадзіне.