«Унікальная» краіна

Сярод еўрапейскіх краінаў толькі ў Беларусі здзяйсняецца смяротнае пакаранне. І гэтая праблема сталася адзінаю прычынаю, праз якую ў 2010 годзе нашай краіне не вярнулі статусу адмыслова запрошанай падчас сесіі Парламенцкай асамблеі Рады Еўропы. Аднак нават палітычныя наступствы не пераконваюць улады Беларусі ў неабходнасці спыніць практыку забіваць людзей ад імя дзяржавы. Год таму Святлана даведалася, што ейнага сына расстралялі. Суд прызнаў Андрэя Жука вінаватым ва ўзброеным нападзе ды падвойным забойстве. Яго прысудзілі да смяротнага пакарання. Маці ніколі не даведаецца, дзе выканалі вырак і дзе пахавалі цела.