Сяргей Каваленка спыніў галадоўку

Сяргей Каваленка спыніў галадоўку, якую трымаў больш за два месяцы на знак нязгоды з пераследам уладаў і турэмнага зняволення за вывешванне бел-чырвона-белага сцяга. Актывіста не змусілі змяніць пазіцыю ні турэмныя ўлады, ні просьбы паплечнікаў ды блізкіх. Але чаго не здолелі зрабіць у турме -- ціскам ды гвалтам, тое атрымалася, літаральна за некалькі дзён, у псіхіятрычным шпіталі. "Беларус памірае за сцяг" -- казалі пра Сяргея Каваленку замежныя медыі. Чатыры месяцы за кратамі, больш за два месяцы бесперапыннай галадоўкі. Сяргей не паддаваўся ні на ўгаворванні сваякоў, ні грамадзянскай і міжнароднай супольнасці. І вось сёння вязень паведаміў бацьку, што пачаў выходзіць з галадоўкі.