Цяжкасці паразумення

Улады Беларусі захоўваюць жорсткую рыторыку ў тэме палітвязняў і дыпламатычнага канфлікту з Еўразвязам. Кіраўнік Адміністрацыі прэзідэнта абяцае нікога не вызваляць пад ціскам, а дзяржаўнае тэлебачанне ўвогуле намякае на магчымае вяртанне Саннікава і Бандарэнкі за краты. Аднак шмат хто бачыць у гэтых гучных заявах праяву слабасці афіцыйнага Менску. Навіна пра вызваленне дваіх палітвязняў, што ўскалыхнула дэмакратычную супольнасць краіны, засталася незаўважная для дзяржаўных медыяў. Толькі праз 3 дні Беларускае тэлебачанне ў даволі дзіўным кантэксце распавяло пра падзею.