Справы нацменаў 2.0

Грамадзянская супольнасць Беларусі ды беларускія дыяспары ва ўсім свеце абураныя дзеяннямі расейскіх праваахоўнікаў. Беларуса з Іркуцку Аляксея Кухту абвінавацілі ў экстрэмізме. Пагроза крымінальнай справы навісла і над Алегам Рудаковым, які шаснаццаць гадоў ачольвае Іркуцкае таварыства беларускай культуры. Гукалі вясну -- наклікалі абвінавачанне ў экстрэмісцкай дзейнасці. Дроваў у справе наламалі расейскія праваахоўнікі. У старшыні беларускага таварыства ў Іркуцку, якога назвалі "духоўным лідарам экстрэмісцкай групоўкі", знайшлі "падрыўную літаратуру". Кішэнныя календары з выявамі генерала Булак-Балаховіча ды паэта, аднаго з класікаў беларускага Адраджэння, Алеся Гаруна.