Кошт рубля, як кошт здароўя

Ужо на гэтым тыдні кошты на імпартныя лекі, а таксама айчынныя медыкаменты з імпартнай сыравіны могуць вырасці прынамсі на траціну. Нацбанк забараніў набываць валюту на асноўнай валютнай сесіі «для аплаты лекавых сродкаў, вырабаў медычнага прызначэння». Такую інфармацыю распаўсюдзіў сёння шэраг медыяў са спасылкаю на ліст намесніка старшыні Нацбанку Тараса Надольнага. А гэта азначае, што адгэтуль імпарцёрам давядзецца купляць валюту для набыцця лекаў за мяжою не паводле афіцыйнага, а рынкавага курсу, вышэйшага на 35 адсоткаў. Міжтым у панядзелак агульнае падзенне «зайчыка» на сённяшняй дадатковай сесіі склала каля 2 адсоткаў. У дачыненні еўра беларуская валюта саступіла чарговыя 200 рублёў. І цяпер курс складае 11 010 руб. за 1 еўра. Выраслі і іншыя замежныя валюты. Выняткам стаўся долар ЗША. Але і тут аніякай інтрыгі: сёння па ім гандлявання папросту не праводзілі. Валеры Руселік, «Аб'ектыў»