МУС з асецінскім акцэнтам

Шэрагі самых высокапастаўленых беларускіх сілавікоў папоўніліся чарговым выхадцам з іншай краіны. Прэзідэнцкім указам генерал-маёр Валерый Гайдукевіч вызвалены з пасады намесніка міністра ўнутраных справаў і камандуючага ўнутранымі войскамі ды звольнены ў запас па ўзросце. На вакантнае ж месца Лукашэнка прызначыў нарадзінца Паўночнай Асеціі ды выхаванца Акадэміі Генштабу Расеі падпалкоўніка Юрыя Караева. Дагэтуль Караеў паспеў прайсці службовы шлях ад камандзіра міліцэйскай брыгады ў Гомлі да першага намесніка начальніка аператыўнага і баявога рыхтавання ўнутраных войскаў МУСу. Пэўны час кіраваў менскім АМАПам, браў удзел і асабіста камандаваў здушэннем шмат якіх мірных дэманстрацыяў апазіцыі.