Як беларускія вернікі адзначаць 100 год БНР

Некаторыя канфесіі пачалі рыхтавацца да сьвята аднаўленьня Незалежнасьці.

Праваслаўная царква Маскоўскага патрыярхату ня будзе адзначаць афіцыйна, але некаторыя праваслаўныя адзначаць сьвята самастойна, шэраг мерапрыемстваў плянуюць каталікі і ўніяты. Зьвестак пра сьвяткаваньне ў рэлігійных установах юдэяў, мусульманаў і іншых пакуль няма, перадае «Радыё Свабода».

На пачатку «Сьвята незалежнасьці» ля менскага Опэрнага тэатру прагучыць хрысьціянскі гімн «Магутны Божа».

Каталікі

Каталіцкія біскупы Беларусі заклікалі маліцца 25 сакавіка за краіну і народ, вырашылі стварыць адмысловую малітву. Як менавіта гэта будзе адбывацца, кожны сьвятар мае вырашыць у сваёй парафіі: недзе заплянаваная асобная імша, недзе малітва за Беларусь будзе адным з заклікаў да вернікаў.

«Касьцёл сваёй малітваю, сваёй прысутнасьцю асьвячае нашую зямлю, таму біскупамі было прынятае рашэньне аб стварэньні адмысловай малітвы, якой сьвятары ў гэты дзень будуць прасіць Бога за нашу Бацькаўшчыну, наш народ, каб добры Бог дабраслаўляў і напаўняў нашую штодзённасьць сваёй прысутнасьцю», — тлумачыў афіцыйны прадстаўнік Канфэрэнцыі каталіцкіх біскупаў у Беларусі Юры Санько.

25 сакавіка кіраўнікі Каталіцкай царквы адправяць службы за Беларусь: мітрапаліт Менска-Магілёўскі арцыбіскуп Тадэвуш Кандрусевіч адслужыць сьвятую імшу а 10:00 у менскім архікатэдральным касьцёле Панны Марыі, а дапаможны біскуп Аляксандар Яшэўскі — у магілёўскай катэдры аб 11-й.

«Вельмі сымбалічна, што акт незалежнасьці Беларускай Народнай Рэспублікі, калі было абвешчана аб заснаваньні новай дзяржавы, быў падпісаны менавіта ў сьвята Зьвеставаньня Пана — 25 сакавіка», — разважаў Кандрусевіч. Сёлета сьвята Зьвеставаньня перанесенае ў каталікоў на 9 красавіка, бо на 25-га прыпадае Вербная нядзеля.

Паводле Кандрусевіча, сьвята абвяшчэньня незалежнасьці БНР — гэта «сьвята беларускага зьвеставаньня незалежнасьці». І хоць абвяшчэньне не прывяло да чаканага выніку, сам факт «вельмі красамоўны, бо сьведчыць пра жаданьне беларускага народу да незалежнасьці».

Грэка-каталікі

24 сакавіка — за дзень да сьвята — у сталіцы Польшчы Варшаве будзе адслужаная грэка-каталіцкая літургія на беларускай мове. Яна лічыцца нядзельнай, таму ўдзел зьявіцца выкананьнем царкоўнага абавязку.

У Горадні грэка-каталікі правядуць дзень малітваў за Бацькаўшчыну, ад 10-й будзе служыцца літургія сьвятога Яна Залатавуснага ў парафіі Маці Божай Фацімскай, па заканчэньні якой пройдзе малебен за беларускі народ. У Полацку такі малебен правядуць аб 11:30 у парафіі сьвятога мучаніка Язафата. Малебны могуць прайсьці і ў іншых грэка-каталіцкіх парафіях.

Праваслаўныя

Паводле словаў прэс-сакратара БПЦ Сяргея Лепіна, на афіцыйным узроўні Беларуская праваслаўная царква не плянуе адзначаць 100-годзьдзе абвяшчэньня незалежнасьці БНР (хоць некалі маскоўскі патрыярх бласлаўляў урад БНР).

Але ў Івянцы 25 сакавіка ў царкве ў гонар прападобнай Эўфрасіньні ад 9-й раніцы будзе служыцца беларускамоўная літургія і малебен за беларускі народ.

Беларускамоўная літургія таксама пройдзе ў гэты дзень ад 9-й раніцы ў храме блажэннай Ксеніі Пецярбургскай у Горадні, за дзень да таго, 24 сакавіка, а 7:30 у саборы ў гонар сьвятых апосталаў Пятра і Паўла ў Менску і а 9:00 у царкве сьвятых Барыса і Глеба ў Горадні.

Інтэлектуальная гульня ў пратэстанцкай царкве

28 сакавіка а 19-й гадзіне ў менскай царкве хрысьціян веры Эвангельскай пачнецца сьвяточная інтэлектуальная гульня «БНР-quiz». Абяцаюць ня толькі цікавыя факты пра БНР, але і сьпевы, і тэатральныя замалёўкі. Для ўдзелу патрэбная каманда з трох-пяці чалавек. Уваход вольны, але патрэбная папярэдняя рэгістрацыя.