«Наша Ніва»: У турмах мяняюцца палітычныя настроі

Гэтая з’ява можа мець доўгатэрміновы эфект.

Беспрэцэдэнтная колькасць палітвязняў у ізалятарах уплывае на настроі крымінальных вязняў і персаналу. Пра гэта сведчаць абрыўкі інфармацыі, якія даходзяць з турмаў праз ліставанне і ад тых людзей, якія выходзяць, піша «Наша Ніва».

За жнівень-верасень за кратамі пабывалі тысячы затрыманых. Акрамя таго, у СІЗА ўтрымліваюцца некалькі соцень арыштаваных па крымінальных справах. Іх, да таго ж, пераводзілі з турмы ў турму.

З «палітычнымі» перасякаюцца тысячы вязняў і супрацоўнікаў МУС. Гэта стварае нечаканыя сацыяльныя кантакты ў асяроддзях, у якія ў іншай сітуацыі апазіцыйныя ідэі не маглі б пранікнуць хутка.

Атрыманне турэмнага досведу тысячамі праціўнікаў дыктатуры і іх уплыў на настроі «за мурамі» — нечаканае наступства масавых рэпрэсій 2020-га, якое можа мець доўгатэрміновы эфект.