Аліна Стэфановіч: Перад маім выступам у Нью-Ёрку прагучала «Жыве Беларусь!»

Беларускія праваабаронцы атрымалі прэмію The Albie Awards 2022, заснаваную Фондам Клуні «За справядлівасць».

Праваабарончы цэнтр «Вясна» атрымаў прэмію The Albie Awards 2022, заснаваную Фондам Клуні «За справядлівасць». Беларускіх праваабаронцаў адзначылі ў намінацыі «Справядлівасць для абаронцаў дэмакратыі».

Прэмію прымала Аліна Стэфановіч – жонка палітвязня, праваабаронцы «Вясны» Валянціна Стэфановіча. Яна падзялілася з «Радыё Рацыя» сваімі ўражаннямі наўпрост з Нью-Ёрку:

- Гэтая прэмія – прызнанне усёй той працы, той дапамогі людзям, якую «Вясна» рабіла цягам 26 гадоў.

- Варта прыгадаць, што шасцёра «вясноўцаў» зараз знаходзяцца за кратамі. Гэта Алесь Бяляцкі, Валянцін Стэфановіч, Уладзімір Лабковіч, Леанід Судаленка, Марфа Рабкова і Андрэй Чапюк.

- Прэмію, вядома, далі не таму, што людзі за кратамі, хоць, зразумела, што тую цану, што плацяць хлопцы і дзяўчаты за тое, што яны займаліся правамі чалавека, дапамагалі людзям, гэта сапраўды вельмі высокая цана, што і адзначалі стваральнікі гэтай прэміі Фонд «Клуні за справядлівасць» Джордж і Амаль Клуні. І ёсць вялікі спадзеў, што такое прыцягненне ўвагі да Беларусі пакідае Беларусь у агульнай глабальнай павестцы, і што гэта дапаможа праваабаронцам выйсці раней на волю.

- Ці пыталіся ў вас пра Беларусь, дзе яна знаходзіцца? Як па вашых адчуваннях, ці ведаюць у Нью-Ёрку пра праблемы Беларусі?

- Па маіх адчуваннях, дастаткова добра праблемы Беларусі гучаць. Ёсць адчуванне, што сярод абедзьвюх асноўных партыяў існуе кансэнсус наконт Беларусі, і ёй зацікаўлены дапамагчы. І перад маім выступам, перад тым, як я зачытала ліст Валянціна, які ён здолеў даслаць з турмы, я пачула: «Жыве Беларусь!». Таму, відавочна, пра Беларусь ведаюць.

- Як выглядае зараз сітуацыя з затрыманымі праваабаронцамі?

- Справы выглядаюць не надта аптымістычна. Прад’явілі лідарам «Вясны» новае абсурднае абвінавачанне. Ім пагражае ад 7 да 12 гадоў зняволення. Але Валянцін не губляе аптымізму, ён піша, што ганарыцца тым, што ён дапамагаў людзям. І што гэта ў пэўным сэнсе прызнанне ягонай працы.