Ціханоўская выступіла перад Сэнатам Польшчы з нагоды юбілею пачатку паўстаньня Каліноўскага

Яна прапанавала польскаму парлямэнту заняць «больш рашучую пазыцыю па Беларусі».

Па запрашэньні сьпікера Сэнату Сьвятлана Ціханоўская і прадстаўнікі Кабінэту 8 лютага ўзялі ўдзел у слуханьнях Сэнату Польшчы.

Падчас выступу Ціханоўская заклікала Сэнат Польшчы прыняць рэзалюцыю ў абарону беларускай незалежнасьці і ўзмацняць ціск на рэжым, паведамляе «Радыё Свабода».

«Сёньня гэтае пытаньне стаіць як ніколі востра. На нашай тэрыторыі знаходзіцца больш за 10 тысяч расейскіх салдат. Расейскія войскі павінны быць выведзеныя ня толькі з Украіны, але і зь Беларусі. Усе дамовы і рашэньні, якія прымае рэжым Лукашэнкі, павінны быць прызнаныя незаконнымі, а сам Лукашэнка павінен апынуцца перад трыбуналам», — сказала яна.

Ціханоўская заклікала падтрымаць рэпрэсаваных беларусаў і ўзмацняць фінансавы і палітычны ціск на рэжым, прымяніць унівэрсальную юрысдыкцыю супраць прадстаўнікоў беларускіх уладаў:

«Польшча можа адкрываць справы супраць сілавікоў і саўдзельнікаў Лукашэнкі ўжо цяпер, але для гэтага неабходна палітычная воля».

Таксама палітык выказала спадзяваньне, што па выніках выбараў у Сэнаце адновіцца праца групы «За дэмакратычную Беларусь» у новым складзе, і прапанавала стварыць праграму стажыровак для маладых беларусаў у верхняй палаце польскага парлямэнту.

Ціханоўская заклікала «захоўваць пасьлядоўнасьць і рашучасьць» і дапамагаць у «пабудове свабоднай Беларусі»:

«Наша першачарговая задача — вярнуць Беларусі суб’ектнасьць. Для гэтага нам вельмі важна, каб свабодная Беларусь была прадстаўленая на міжнародных форумах і пляцоўках, парлямэнцкіх асамблеях Рады Эўропы і АБСЭ. Беларусь павінна быць часткай усіх сустрэч Люблінскага трохкутніка. Гэты альянс, які склаўся гістарычна, адпавядае нашым нацыянальным інтарэсам і чаканьням».

Народы Польшчы і Беларусі зьвязаныя сумеснай гісторыяй, подзьвігі дзеячоў якой «натхняюць беларусаў на барацьбу і сёньня — на барацьбу супраць тыранічнага рэжыму Лукашэнкі і імпэрскай агрэсіі Расеі», а лёзунг «За нашу і вашу свабоду» «стаў актуальны як ніколі раней», адзначыла палітык.

Яна падкрэсьліла, што рэжым Лукашэнкі спрабуе зьнішчыць «дружнае сумеснае жыцьцё беларусаў і палякаў»: закрывае польскія школы, разбурае помнікі ўдзельнікам польскага супраціву:

«Усё гэта — зачыстка нашага традыцыйнага шматгалосься на карысьць манатоннага і бязьлітаснага «рускага сьвету».

«Сярод герояў, якія абʼядноўваюць Беларусь і Польшчу, — Анджэй Пачобут, які нават у засьценках не скарыўся, застаецца верны сваім ідэалам барацьбы за свабоду, — сказала яна. — Вельмі важна, што Польшча выступае ў абарону Пачобута і ўсіх вязьняў рэжыму Лукашэнкі. Таксама важна, калі Польшча паказвае прыклад паважлівага стаўленьня да ідэнтычнасьці беларускай меншасьці на Падляшшы. Таксама — калі тыя беларусы, што нядаўна апынуліся ў Польшчы як бежанцы, адчуваюць з боку польскай дзяржавы дапамогу і разуменьне».

Ціханоўская падкрэсьліла, што «свабодная Беларусь будзе саюзьнікам і сябрам для Польшчы».

Па словах палітыка, яна верыць, што перамены ў Беларусі могуць пачацца «нашмат раней, чым многім здаецца»:

«Рэжым не адчувае сябе ўпэўнена і паводзіць сябе так, быццам сотні тысяч людзей усё яшчэ пратэстуюць пад прэзыдэнцкім палацам. Але акрамя рэпрэсій, яму няма чаго прапанаваць беларусам. Лукашэнкаўскі рэжым — палітычны банкрут, а ўлада яго трымаецца выключна на падтрымцы Пуціна. Чым слабейшы Пуцін — тым слабейшы будзе Лукашэнка, і наадварот».

Перад выступленьнем Ціханоўская сустрэлася з маршалкам Сэнату Томашам Гродзкім. Паводле інфармацыі BPN, яна прапанавала польскаму парлямэнту заняць «больш рашучую пазыцыю па Беларусі».