VIP-самалёт для Лукашэнкі

Шыкоўны "Боінг 767-300" хутка трапіць у Беларусь. Прэзідэнцкі лайнер, набыты ў 2005 г. для тагачаснага прэзідэнта Туркменістану Сапармурата Ніязава за $ 130 млн, цяпер паслужыць беларускаму кіраўніку. Пра дамову паміж краінамі паведаміў інтэрнэт-рэсурс "Хартыя-97". Паводле сайту, "Белавія" практычна завершыла навучаць персанал, як карыстацца і абслугоўваць новую тэхніку. Тым часам у прэзідэнцкай прэс-службе інфармацыі пра набыццё VIP-самалёта не пацвярджаюць. Між тым акурат напярэдадні адбылася тэлефонная размова паміж прэзідэнтамі дзвюх дзяржаваў. Эксперты тлумачаць памкненне Беларусі падтрымліваць цесныя сувязі з Туркменістанам не толькі блізкасцю палітычных сістэмаў, але і тым, што афіцыйны Менск праз гэтую краіну хацеў бы атрымаць доступ да энергарэсурсаў і сыравіны. Вольга Старасціна, "Аб'ектыў"