Новости БеларусиRSS-лента
Информационный портал Беларуси "МойBY" - только самые свежие и самые актуальные беларусские новости

У чаканнi новага

05.12.2016 общество
У чаканнi новага

Беларускі футбольны турнір — як люстэрка, адбівае народныя настроі.

Футбольны чэмпіянат Беларусі завершаны. Згуляны апошні матч.

Чэмпіянат, здаецца, быў ці не адзін з самых сумных за апошнія гады, што красамоўна засьведчыла апытаньне на сайце газэты «Прэсбол».

Хто стане першым, стала зразумела даволі рана, хто другім, хто трэцім — трошкі пазьней.

БАТЭ, «Шахтар» і менскае «Дынама» фінішавалі ў той самай чарговасьці, што і летась.

Інтрыга да апошняга жыла толькі ў сутарэньнях табліцы спаборніцтваў, было не зусім ясна, каму выпраўляцца ніжэй за дно.

Праваліліся ў пекла ніжэйшае лігі бабруйская «Белшына» ды мікашэвіцкі «Граніт».

Гісторыя «Белшыны», можна сказаць, павучальная, і нават дыдактычная, нагадвае сюжэт песьні пра Надзеньку з «Народнага альбому».

Спакушаны абяцанкамі расейскага спонсара, бабруйскі клюб марыў пра сьветлую й шчасьлівую будучыню, але... спачатку зьнік «красівы» спонсар, сьледам за ім — грошы, пасьля — настрой і натхненьне гульцоў, трэнераў і заўзятараў.

«І асталася бедна Надзенька, з чамаданам пустым у руках. Аблілась слязой, з тым пайшла дамой. Так прайшлі маладыя гада».

Другі дывізіён — самае месца, дзе варта паразважаць над зьменлівым лёсам і, самае галоўнае, ад чаго ён робіцца такім зьменлівым.

Увогуле, бадай адзіным і самым яркім выключэньнем сёлетняга турніру былі навічкі Вышэйшае лігі — менскія «Крумкачы» ды «Іслач» зь Менскага раёну, якія так ці інакш будзілі соннае царства нацыянальнага чэмпіянату.

Першыя прымусілі зьвярнуць на сябе ўвагу бадзёрым настроем, вясёлай гульнёй і нестандартным падыходам да пабудовы клюбнае гаспадаркі, дый увогуле сталіся адкрыцьцём гэтага сезону, асабліва ў першай палове, пасьля якой былі трэцімі.

Другія вызначыліся скандалам з дагаворнымі матчамі і эмацыйнымі трэнэрскімі сьпічамі на прэс-канфэрэнцыях.

Дый у гульнях паміж сабой навічкі трымалі высокі градус скандальнай цікавасьці да сябе.

«Крумкачы» закончылі чэмпіянат адзінаццатымі, па дарозе згубіўшы свайго трэнэра — Алега Дулуба (які прыняў заманлівую прапанову львоўскіх «Карпат») і патрапіўшы ў чорны сьпіс падатковай інспэкцыі, але не згубіўшы пры гэткіх абставінах пазытыўнага настрою.

«Іслач» апынулася на фінішы сёмай, але наступны сэзон пачне з сямібальным дэфіцытам, такое пакараньне атрымаў клюб за ўдзел у дагаворных матчах.

Цяжка сказаць, якім чынам і каго б прывабліваў нацыянальны чэмпіянат, калі б ня гэтыя навабранцы.

Невядома, што зь імі станецца ў наступным сэзоне, але вельмі хочацца верыць, што яны ня згубяць свайго неабыякавага настрою дый эмоцый там, дзе ўсе астатнія клюбы, падобна, загадзя ўладкаваліся кожны на сваім шастку й пазяхалі ад суму, прадказальнасьці й самоты.

Падобна на тое, што менавіта навічкі мелі тое, што робіць футбол гульнёй мільёнаў, яны мелі жарсьць да гульні, так ці інакш былі неабыякавымі на полі й па-за ім.

Футбол — гульня народная й беларускі футбольны турнір — як люстэрка, адбівае народныя настроі, дзе таксама пануе самота й абыякавасьць, але так хочацца новых эмоцый, новых герояў, новых падзей.

Алег Дашкевіч, «Радыё Свабода»

Источник charter97.org

Вверх ↑
Новости Беларуси
© 2009 - 2022 Мой BY — Информационный портал Беларуси
Новости и события в Беларуси и в мире.
Пресс-центр [email protected]