Нечаканая перамога ў судзе! Старшыню юрыдычнай камісіі Беларускага Хельсінкскага камітэту Гары Паганяйлу выключылі са спісу невыязных з Беларусі. Паводле рашэння суда, праваабаронца трапіў у яго праз тэхнічную памылку міліцыі. У зале паседжанняў прадстаўнікі МУС папрасілі прабачэння ў праваабаронцы. Аднак ягоны пазоў да міністэрстваў юстыцыі ды ўнутраных справаў застаўся не задаволены. belsat.eu
Замест вызвалення палітвязняў -- павелічэнне іх колькасці. Следчы камітэт паведаміў, што на журналіста Андрэя Пачобута, якога ўзялі пад варту напярэдадні, завялі крымінальную справу. Следчыя сцвярджаюць, што адмысловая дзяржаўная экспертыза знайшла ў публікацыях Пачобута словы і выразы, якія зневажаюць прэзідэнта і дыскрэдытуюць Рэспубліку Беларусь. Незалежныя ж эксперты лічаць, што афіцыйны Менск, беручы чарговага палітычнага закладніка, адкрывае новы раўнд гандляванняў з Захадам. belsat.eu
Гадавіну пачатку вайны Аляксандр Лукашэнка сустрэў у наваствораным Музеі сучаснай беларускай дзяржаўнасці -- фактычна, гэта помнік эпосе ягонага кіравання. Ці гэта выпадковы збег абставінаў -- або разлік згуляць на ваенных сімвалах і паказаць сваю моц? Каму адрасавалася сённяшняя ваяўнічая рыторыка кіраўніка краіны? belsat.eu