Видео-новости

І хоць статыстычна беларусаў становіцца менш, але гэтую дзяўчыну, на радасць усім мужчынам, мы з задавальненнем запісалі да "нашых". Галівудская акторка Скарлет Ёгансан пахвалілася сваімі беларускімі каранямі. На прэзентацыі фільму «Мсціўцы» ў расейскай сталіцы яна прызналася, што сямя ейнай маці Мэлані Слоўн паходзіць з менскіх габрэяў. Магчыма, што менавіта карані і дапамаглі Скарлет Ёгансан бліскуча выканаць у новым фільме «Мсціўцы» ролю расейскай шпіёнкі Наташы Раманавай.

Еўропа перасядае на экалагічна чысты транспарт. І калі, напрыклад, у Амстэрдаме гарадскія ўлады спынілі свой выбар на электрычнасці ў якасці крыніцы энергіі, у шведскай сталіцы стаўку зрабілі на біягаз. На гэтае паліва пераводзяць найперш машыны для збору смецця і грамадскі транспарт, у тым ліку таксоўкі. Таксоўку на біягазе пазнаць у Стакгольме вельмі проста. Дзякуючы вось гэтаму зялёнаму лісціку на дзверцах. Лісціку, які азначае, што гэты "мерседэс" сябруе з прыродаю. І хаця біягаз сваімі характарыстыкамі мала адрозніваецца ад газу звычайнага, спосаб яго здабычы -- а дакладней вытворчасці -- зусім іншы.

Абяцанне чыноўнікаў паставіць у Горадні помнік Кастусю Каліноўскаму замарожанае цягам дваццаці трох гадоў. Гэтага часу акурат хапіла на тое, каб вырасла новае пакаленне свядомых маладзёнаў. І менавіта яны, гарадзенскія маладафронтаўцы, распачалі збор подпісаў дзеля ўшанавання памяці нашага слаўнага продка. Увекавечаныя ў граніце, звысоку на беларусаў пазіраюць будаўнікі камуністычнай імперыі ды стваральнікі яе катавальнай машыны. Пры гэтым для ўвекавечвання герояў уласна беларускай гісторыі часта бракуе ці то каменю, ці то месца.

"Годныя і смелыя дзеці Беларусі" -- гэтак у Камітэце дапамогі рэпрэсаваным "Салідарнасць" назвалі новы праект, у якім -- дзесяць фільмаў-партрэтаў маладых змагароў, рэпрэсаваных за Плошчу. 19 снежня змяніла жыццё звычайных людзей, якія сталі героямі нашай сучаснай гісторыі. Былы палітзняволены Сяргей Казакоў. У свой час турма перакрэсліла ягоныя планы на будучыню. Цяпер, праз некалькі месяцаў на волі, ён па-новаму спрабуе ацаніць час, на першы погляд, страчаны за кратамі

Самая вясна, а сталічнымі вуліцамі сёння шпацыравалі Дзед Мароз і Снягурка. Ад іх мінакі атрымлівалі ў падарунак пустыя абяцанні. Гэтак выглядаў чарговы флэшмоб актывістаў моладзевага крыла кампаніі "Гавары праўду". Пераапранутыя актывісты раздавалі мінакам купюры коштам 500 рублёў, на якіх слова "рублёў" было закрэсленае. Замест яго -- напісанае слова "баксаў". Такім чынам маладзёны спрабавалі звярнуць увагу беларусаў на ўрадавыя абяцанні заробку 500 долараў, якія гэтак і не ажыццявіліся.

Нас ужо даўно не дзясяць мільёнаў, і ўжо нават менш за дзевяць з паловаю. Паводле апошніх звестак "Белстату", мы перакрочылі чарговую псіхалагічную мяжу ў колькасці насельніцтва. За апошні год людзей у Беларусі паменела на 16 тысячаў чалавек.

Беларускі бок шукае і іншыя спосабы ціску на Еўропу. У хаду пайшлі пагрозы змяніць падыход да аховы мяжы з Еўразвязам. Пра гэта паведамляе агенцыя БелаПАН са спасылкаю на крыніцы ў Дзяржаўным памежным камітэце.

Улады Беларусі захоўваюць жорсткую рыторыку ў тэме палітвязняў і дыпламатычнага канфлікту з Еўразвязам. Кіраўнік Адміністрацыі прэзідэнта абяцае нікога не вызваляць пад ціскам, а дзяржаўнае тэлебачанне ўвогуле намякае на магчымае вяртанне Саннікава і Бандарэнкі за краты. Аднак шмат хто бачыць у гэтых гучных заявах праяву слабасці афіцыйнага Менску. Навіна пра вызваленне дваіх палітвязняў, што ўскалыхнула дэмакратычную супольнасць краіны, засталася незаўважная для дзяржаўных медыяў. Толькі праз 3 дні Беларускае тэлебачанне ў даволі дзіўным кантэксце распавяло пра падзею.

belsat.eu

belsat.eu

belsat.eu