Видео-новости

Ці праўду сказаў Сурыкаў?

01.12.2011

Аляксандр Сурыкаў заявіў напярэдадні, што продаж "Белтрансгазу" пазітыўна ацаніла частка апазіцыйнага асяроддзя. Сярод іншых, кампанія "Гавары праўду!", Беларуская партыя левых "Справядлівы свет", а таксама палітык Анатоль Ляўковіч, які лічыць сябе старшынём Беларускай сацыял-дэмакратычнай партыі "Грамада". АЛЯКСАНДР СУРЫКАЎ, АМБАСАДАР РАСЕІ Ў БЕЛАРУСІ: "Тыя, хто разумее, што самае галоўнае ў дзяржаве -- гэта жыццё людзей і яго паляпшэнне, а не імкненне да ўлады шляхам скідання дзейнай улады, -- а пасля хоць трава не расці, -- яны ацэньваюць гэта разумна".

Рука руку грэе

01.12.2011

Падобна на тое, што карупцыя, на хвалі змагання з якою сямнаццаць гадоў таму да ўлады прыйшоў Аляксандр Лукашэнка, канчаткова захліснула нашую краіну. Прынамсі пра гэта сведчыць чарговы рэйтынг міжнароднай арганізацыі "Transparency International". За апошні год нашая краіна скацілася у ім адразу на 16 пунктаў. Паводле аўтараў даследавання, Беларусь займае 143-ю пазіцыю са 189-ці наяўных. Непачэсны пасаг сёлета з Беларуссю дзеляць Расея, а таксама такія краіны, як Азербайджан, Маўрытанія, Нігерыя ды Уганда.

Прысуды пад прыцэлам

01.12.2011

Рэха смяротных вердыктаў, вынесеных у беларускім Доме правасуддзя, прагучала на ўвесь свет. Першыя рэакцыі прыйшлі ад кіраўніцтва Еўразвязу. МАЯ КАЦЫЯНЧЫЧ, ПРЭС-САКРАТАР КЭТРЫН ЭШТАН: "Вярхоўная прадстаўніца Еўразвязу ў пытаннях замежнай палітыкі Кэтрын Эштан выказвае шкадаванне з нагоды смяротнага прысуду Канавалаву і Кавалёву. Але мы спадзяемся, што суд будзе ў поўнай меры шанаваць іхнае права на апеляцыю". Выказаў шкадаванне з нагоды вынесеных прысудаў і старшыня Еўрапарламенту Ежы Бузэк -- у сваім запісе на "Twitter".

Вырак -- вышэйшы за жыццё

01.12.2011

Зачытванне выраку. Твар Уладзіслава Кавалёва скамянеў у чаканні. Ён не зменіцца і пасля словаў: "Пакараць смерцю праз расстрэл". Толькі пазней стане вядома, што ў гэты момант аператар Беларускага тэлебачання вылучыў гук, бо зала выбухнула незадавальненнем, выкрыкваючы суду "Ганьба!". Сярод іх былі і пацярпелыя ад тэракту. СВЯТЛАНА, ПАЦЯРПЕЛАЯ: "Як звычайна кажуць, суд разбярэцца. Але ці разабраўся?.. Цяжка сказаць". Словы няпэўнасці ад назіральнікаў працэсу -- але пры гэтым брутальны прысуд.